З сенняшняга дня канцэрн «Белнафтахім» павысіў рознічныя цэны на нафтапрадукты, якія рэалізуюцца праз АЗС, у сярэднім на 31%. Як адзначаецца ў афіцыйным прэс-рэлізе канцэрна, гэта зроблена «ў мэтах абароны ўнутранага рынку ад несанкцыянаванага вывазу нафтапрадуктаў, змяншэння дыспарытэту коштаў на аўтамабільнае паліва ў Беларусі і суседніх дзяржавах і забеспячэння эфектыўнай работы нафтаперапрацоўчых заводаў». Канцэрн «Белнафтахім» адзначае, што згодна з маніторынгам рэалізацыі нафтапрадуктаў на аўтазаправачных станцыях сістэмы канцэрна, на працягу мая 2011г. у параўнанні з аналагічным перыядам мінулага года рэалізацыя аўтамабільнага паліва ўзрасла ў 1,5 разы, у тым ліку на АЗС у прыгранічных раенах - у 2,3 раза. Нагадаем, гэта ўжо чацвертае селета павышэнне кошту аўтамабільнага паліва. Апошні раз канцэрн павялічваў на 16-24% рознічныя цэны на нафтапрадукты 24 мая 2011 г. У Расеі з ростам коштаў на паліва вырашылі змагацца шляхам будаўніцтва новага дзяржаўнага НПЗ.