Сардэчныя прыступы - вось яшчэ адна небяспека, якую нясуць дарогі з інтэнсіўным рухам. Да такой высновы прыйшлі навукоўцы з Лонданскай школы гігіены і трапічнай медыцыны ў рамках свайго даследавання. Яны прааналізавалі 80 тыс. пацыентаў з сардэчнымі прыступамі, зафіксаванымі ў Англіі і Уэльсе, а потым супаставілі іх з узроўнем забруджвання паветра ў дадзеных раёнах. Высветлілася, што рызыка інфаркту рэзка ўзрастае на працягу шасці гадзін пасля ўдыхання паветра з высокай канцэнтрацыяй выхлапных газаў. «Забруджванне выклікае згушчэнне крыві, што павышае рызыку сардэчнага прыступу», - распавёў Джэрэмі Пірсан, дырэктар Брытанскага кардыялагічнага фонду. Па ўсёй бачнасці, выхлапныя газы спрыяюць узнікненню прыступу, хоць і не з'яўляюцца яго прамой прычынай. Цікава, што раней амерыканскія навукоўцы заяўлялі, што забруджвання паветра каля аўтамабільных трас адмоўна адбіваюцца на памяці і правакуюць хваробы Альцгеймера. Зрэшты, расейцам такія «страшылкі» ні да чаго: Дзень без аўтамабіля Масква традыцыйна сустрэла коркамі.